वीरगंज, २० फागुन । म्याग्नस फर्माले आज होटेल भिस्वामा पत्रकार सम्मेलन गरी सन् २००७ मा स्थापना भएको यस औषधि उद्योगले १०९ ब्रान्डसहित २०७ प्रकारका औषधि उत्पादन गरिरहेको जानकारी गराएको छ ।
पत्रकार सम्मेलनमा म्याग्नस फर्माका प्रबन्ध निर्देशक सुधिर प्रसाद मास्केले नेपाली बजारमै पहिलोपटक मधुमेह, अल्जाइमर्स, हेपाटाइटिस सी र बी जस्ता रोगका लागि अत्यावश्यक औषधिहरू उत्पादन गरेको जनाएको छ ।
बारा जिल्लाको जितपुरसिमरा उपमहानगरपालिका–२३ भलुहीमा नयाँ प्लान्ट जडान गरी म्याग्नस फर्मा प्रालिले मिर्गाैला रोगका लागि औषधिहरू पनि उत्पादन गरिरहेको उनले बताएका छन् । विश्व स्वास्थ्य संगठनको मापदण्ड अनुसार यस कम्पनीले नेपाली बजारका लागि औषधिहरू गुणस्तरयुक्त उत्पादन गरिरहेको जनाएको छ । म्याग्नस फर्माका अध्यक्ष सन्दिप तुलस्यानले देशको औषधि आयातलाई प्रतिस्थापन गर्ने लक्ष्य लिएको बताए ।
प्राबिधिक निर्देशक सर्वाेत्तम गिरीले सुरक्षित, असरदार तथा उच्चतम गुणस्तरीय औषधि उत्पादन गर्न कटिबद्ध रहने बताए । म्याग्नस फर्माका वित्तीय निर्देशक विनित लोहियाले थप एक अर्ब भन्दा बढीको लगानी गरिसकेको र सिथिल अर्थतन्त्र तथा रोजगारी प्रवर्धनमा थोरै भए पनि टेवा पु-याएको बताए ।