वीरगंज २५ जेठ । पर्साका सुनचाँदी व्यवसायीहरूले सरकारले चालू आर्थिक वर्षदेखि सुनचाँदीका गरगहनामा नयाँ मूल्य अभिवृद्धि कर (भ्याट) लागू गरेपछि प्रदर्शन गरेका छन् ।
आज वीरगंजमा ब्यानर, प्लेकार्डसहित प्रदर्शन गर्दै पर्सा सुनचाँदी व्यवसायी संघ र पर्सा सुनचाँदी कालीगढ संघले १० लाख रुपियाँभन्दा माथिका गरगहनामा मात्रै लाग्ने विलासिता करलाई हटाएर सबै मूल्यका गहनामा २ प्रतिशत भ्याट लगाइनु तथा हिरा र बहुमूल्य पत्थर जडित गहनामा १३ प्रतिशत भ्याट लगाइनु उपभोक्तामाथि अन्यायपूर्ण आर्थिक भएको जनाएको छ ।
संघले जारी गरेको विज्ञप्ति अनुसार सुनचाँदीका गरगहना नेपालमा विलासिता नभई परम्परा, संस्कृति, रीतिरिवाज तथा सामाजिक जीवनको अभिन्न हिस्सा हुन । त्यस्ता वस्तुहरूमा कर वृद्धि गर्नुले आम नागरिकको बचत र लगानीमाथि प्रत्यक्ष असर पार्ने जनाएको छ ।
संघले छिमेकी देश भारतको तुलनामा मूल्य वृद्धि अत्यधिक भएकाले यसले चोरीपैठारी र अवैध कारोवार बढ्ने खतरा पनि औंल्याएको छ। अहिले नै सुनको मूल्य आकाशिएको र बजार मन्दीमा रहेको अवस्थामा थप करले बजारमा झन् गिरावट ल्याउने स्पष्ट चेतावनी संघले दिएको छ।
विज्ञप्तिमा करको यस्तो बोझले लाखौं व्यवसायी, कालीगढ र मजदुरको जीविकोपार्जन संकटमा पर्नेछ, संघले भनेको छ, सरकारले यो निर्णय तत्काल पुनरावलोकन गर्नुपर्छ । सरकारको नयाँ कर नीतिले सुनचाँदी उद्योग र बजारमा पार्ने दीर्घकालीन प्रभाववारे पुनरविचार गर्नुपर्ने उल्लेख छ ।